Frá 20. júní til 14. september 2025 þurfa gestir að bóka fyrirfram bílastæði og greiða þjónustugjald áður en komið er til Landmannalauga á milli kl. 9 og 16, ef komið er akandi á eigin vegum. Ekki er þörf á að bóka bílastæði ef komið er á svæðið fyrir kl. 9 eða eftir kl. 16, en þjónustugjald er þó tekið af öllum bifreiðum, allan sólarhringinn.

Opnað verður fyrir bókanir fyrir sumarið 2025 þann 1. apríl

Um Landmannalaugar

Landannalaugar er vinsælasti áfangastaður ferðamanna á miðhálendi Íslands. Svæðið er innan friðlands að Fjallabaki og þar er hægt að tjalda eða kaupa skálagistingu. Fjölmargar gönguleiðir hefjast við skálasvæðið þar sem flest ættu að geta fundið leið við sitt hæfi. Einnig er þetta upphafsstaður Laugavegsins, sem er sennilega þekktasta gönguleið landsins.

Aðkoma er að Landmannalaugum um Fjallabaksleið Nyrðri (F208), en síðustu 2,5 km er ekið eftir Landmannalaugavegi (F224). Leiðin er öll fær fjórhjóladrifnum bílum, en rétt áður en komið er til Landmannalauga þarf að fara yfir tvö vöð. Hægt er að leggja á P1 (við Námskvísl) án þess að fara yfir vöðin og er mælt með því fyrir smærri jeppa og/eða óreynda ökumenn og fara þá yfir göngubrú.