Frá 20. júní til 15. september* 2024 þurfa gestir að bóka fyrirfram bílastæði og greiða þjónustugjald áður en komið er til Landmannalauga á milli kl. 8 og 15, ef komið er akandi á eigin vegum. Svæðið er opið allan sólarhringinn og ekki er þörf á að bóka bílastæði ef komið er á svæðið fyrir kl. 8 og eftir kl. 15.

*Vegna Laugavegshlaupsins verður ekki þörf á að bóka bílastæði í Landmannalaugum 13. júlí.

Bakgrunnsupplýsingar um Landmannalaugar

Landannalaugar er vinsælasti áfangastaður ferðamanna á miðhálendi Íslands. Svæðið er innan friðlands að Fjallabaki og þar er hægt að tjalda eða kaupa skálagistingu. Fjölmargar gönguleiðir hefjast við skálasvæðið þar sem flest ættu að geta fundið leið við sitt hæfi. Einnig er þetta upphafsstaður Laugavegsins, sem er sennilega þekktasta gönguleið landsins.

Aðkoma er að Landmannalaugum um Fjallabaksleið Nyrðri (F208), en síðustu 2,5 km er ekið eftir Landmannalaugavegi (F224). Leiðin er öll fær fjórhjóladrifnum bílum, en rétt áður en komið er til Landmannalauga þarf að fara yfir tvö vöð. Hægt er að leggja á P1 (við Námskvísl) án þess að fara yfir vöðin og er mælt með því fyrir smærri jeppa og/eða óreynda ökumenn og fara þá yfir göngubrú.